میلہ جشن بہاراٮ ڈیرہ

جشن مناتے اہلیان ڈیرہ کی خوشیاں امن دشمن قوتوں کو ہضم نہ ہو سکیں، تحصیل پروآ کے علاقہ سکندر جنوبی میں جاری میلہ جشن بہاراں میں نامعلوم افراد کی جانب سے دستی بم پھینک دیا گیا،دو ایف سی اہلکاروں سمیت چوبیس افراد زخمی، حملے کے بعد میلے میں شدید بھگدڑ، زخمیوں کو فوری طور پر ڈی ایچ کیو ہسپتال ڈیرہ اسماعیل خان پہنچا دیا گیا، چار زخمیوں کی حالت تشویشناک،حملہ آور فرار ہونے میں کامیاب، پولیس اورقانون نافذ کرنے والے اداروں نے حملہ کے مقام سے شواہد اکٹھا کرنے کے ساتھ ساتھ علاقہ میں سرچ آپریشن شروع کر دیا، مشتبہ شخص کی گرفتاری کی متضاد اطلاعات، واقعہ سے ضلع میں جاری دیگر میلہ جات اور دیگر سرگرمیوں کے متاثر ہونے کا خدشہ۔ تفصیلات کے مطابق، ضلع بھر میں ان دنوں جشن بہاراں کے سلسلے میں مختلف قسم کے میلہ جات جاری ہیں جن میں امن اور بہار کی خوشیوں کے لئے مختلف قسم کی ثقافتی سرگرمیاں منعقد کی جا رہی ہیں۔ انہی میلہ جات میں سے ایک میلہ گزشتہ روزتحصیل پروآ کے علاقہ سکندر جنوبی میں جاری تھا کہ میلہ کے لئے بنائے گئے سٹیج پر نامعلوم افراد نے دستی بم پھینک دیا۔ خوشیوں کے میلے میں بارود کے زور دار دھماکے سے ہر طرف بھگدڑ مچ گئی۔ حملہ کے نتیجے میں سٹیج اور گرد نواح میں موجود 24افراد زخمی ہو گئے جن میں دو ایف سی اہلکار بھی شامل تھے۔ سکندر جنوبی میلہ کے روح رواں اور مہمان خصوصی سردار قیضار خان میانخیل اس بم حملے میں معجزانہ طور پر محفوظ رہے۔حملے میں زخمی ہونے والے افراد میں خیام خان ولد ذوالفقار قوم میانخیل سکنہ درابن حال سٹی سکول ڈیرہ، سیف اللہ ولد ملک نظام سکنہ کیچ، سونا خان ولد شیرو خان سکنہ کلاچی، رانا سلیم ولد حاجی حکم اللہ سکنہ محلہ گوسائیاں ڈیرہ شہر، عبد الرحمان ولد صاحب جان سکنہ درابن کلاں، عظمت اللہ ولد سعداللہ محلہ خدمتگاراں ڈیرہ شہر، روشن ضمیر لغاری ولد غلام حسین سکنہ گلشن کالونی ڈیرہ شہر، محمد کامران ولد عنایت اللہ سکنہ جھوک ڈمرہ، عبدالسعید ولد عمر خان سکنہ محلہ لغاری ڈیرہ شہر، محمد اسلم ولد شاہجہان سکنہ پروآ، برکت اللہ ولد ہیبت خان سکنہ نائیویلہ، محمد اظہار ولد فلک شیر سکنہ پروآ، مبشر ولد صاحبداد سکنہ چاہ خان والا، ربنواز ولد حق نوازسکنہ بڈہ شاہ اور وقاص ولد نامعلوم سکنہ محلہ لغاری ڈیرہ ,سیف اللہ ولد ناظم سکنہ کیچ، شوکت منیر ولد عبدالعزیز سکنہ عیدگاہ ڈیرہ شہر، سونا خان ولد شیرو خان سکنہ چاہ حسین، اکرم ولد محمد رمضان سکنہ روڑہ، یامین ولد عبداللہ شاہ سکنہ اسلامیہ کالونی ڈیرہ شہر، مبشر ولد صاحبداد سکنہ چاہ خان والا، ربنواز ولد حق نواز سکنہ چودہوان، محمد نواز ولد مراد بخش سکنہ پروآ، محمد رمضان ولد صدر ایوب سکنہ چودہوان شامل ہیں جبکہ ایف سی اہلکار زکریا ولد گل نبی سکنہ چارسدہ اور منصور خان ولد گل مدار سکنہ چارسدہ بھی بم حملہ میں زخمی ہو گئے۔زخمی ہونے والے ان چوبیس افراد میں چار افراد جن میں وقاص، روشن ضمیر لغاری، یامین خان اور سمیع اللہ سدوزئی شامل ہیں ، کی حالت تشویشناک بتائی جا رہی ہے۔ واضح رہے کہ گزشتہ دنوں سکیورٹی خدشات کی بنیاد پر ڈیرہ اسماعیل خان کے میلہ سپان سمیت تمام دیگر میلہ جات اور دیگر سرگرمیوں کو محدود کرنے کی سفارش کی گئی تھی جبکہ ضلع بھر میں سکیورٹی الرٹ بھی جاری کیا گیا تھا جس کی بنیادی وجہ امن دشمن قوتوں کی جانب سے دہشت گردی کے اقدام کا خدشہ بتایا گیا تھا۔